Í dag er fjórði og jafnframt síðasti heili dagurinn í Vatnaskógi, veisludagur. Á döfinni var mikil skemmtun út allan daginn og langt fram eftir kvöldi, en áður en lengra er haldið skal tekið fram að þetta mun verða síðasta fréttin sem verður skrifuð, þannig endilega lesið hana til enda þar sem koma munu fram upplýsingar um brottfarardaginn.
Dagskrá veisludags
Brekkuhlaupið var haldið fyrir hádegi en það var jafnframt síðasta frjálsíþróttagreinin í flokknum. Ýmsar keppnir klárast í dag, íþróttahúsið var opið með heitum pottum ofl. Eftir hádegi var stórleikur milli Stjörnu- og Draumaliðs drengja í knattspyrnu og sitthvorn hálfleikinn gegn ógnarsterku liði foringja! Vatnafjör hélt áfram og marg annað var í boði.
Eftir morgunstund tóku borðin sem drengirnir sitja við þátt í forkeppni fyrir biblíuspurningakeppni og tvö stigahæstu borðin borð 2 og 5 kepptu til úrslita á veislukvöldvökunni þar sem 2. borð fór með sigur að hólmi.
Um kvöldið var veislumatur og í framhaldi veislukvöldvaka, sem var talsvert lengri en fyrri kvöldvökur, með mörgum skemmtilegum uppákomum og tilheyrandi hlátrasköllum.
Veðrið! Búið að rigna í morgun en stytti upp um miðjan dag en svo kom rigning aftur.
Matseðill
Morgunmatur: Morgunkorn og súrmjólk.
Hádegismatur: Hlaðborð, ýmsir réttir.
Kaffitími: Kaka og fleira meðlæti.
Kvöldmatur: Vínar Snitzel með brúnni sósu, bökuðum kartöflum, salati, maís og grænum baunum, rauðkál og gos baukur frá ölgerðinni.
Kvöldhressing: Mjólk/vant og kex.
Dagskrá brottfarardags, 16. ágúst
Drengirnir hafa verið vaktir kl. 08:30 á morgnana en á brottfarardag er venja að gefa þeim ögn lengri svefn. Haninn mun því gala kl. 09:00, þá munu drengirnir fara í morgunmat, pakka í töskur, finna dótið sitt og halda svo út í frjálsan tíma og skipulagða hópleiki áður en haldið verður í hádegismat og síðan verða óskilamunir kynntir sem fundist hafa á víð og dreif um svæðið.
Rútan leggur af stað frá Vatnaskógi kl. 14:00 og áætluð koma á Holtaveg 28 er því kl. 15:00.
Þau ykkar sem hyggjast sækja drengina sína í Vatnaskóg eru beðin um að koma eigi síðar en kl. 13:30. Vinsamlegast látið vita ef þið ætlið að sækja ykkar drengi sjálf ef þeir eru skráðir í rútuna heim, svo töskurnar þeirra fari ekki upp í rúturnar. Þeir sem verða sóttir í Vatnaskóg munu koma farangri sínum fyrir framan matskálann. Endilega látið vita sem fyrst en símatíminn er eins og fyrr segir milli kl. 11:00-12:00 og síminn er 433 8959.
Óskilamunir.
Við reynum að koma öllum óskilamunum í réttar hendur og það sem kemur með rútuni verður sett fyrir framan innanginn á Holtavegi 28 um leið og rútan kemur – um að gera að kíkja á það.
Allir óskilamunir sem ekki skila sér til drengjanna munu fara á Holtaveg 28 í Reykjavík, félagsheimili KFUM og KFUK.
Matseðill
Morgunmatur: Morgunkorn og súrmjólk
Hádegismatur: Vatnaskógarpizzur
Þetta er síðasta færslan frá 12. flokki 2024. Við sem störfum í Vatnaskógi erum þakklát fyrir það traust sem foreldrar sína okkur með því að senda börn sín í sumarbúðir og tökum það traust alvarlega. Það er og metnaður okkar sem störfum í Vatnaskógi að gera gott starf enn betra. Ef þú hefur ábendingar, athugasemdir eða vilt hafa samband við okkur hér í Vatnaskógi í tengslum við 12. flokk getur þú sent tölvupóst á arsaell@kfum.is eða haft samband við skrifstofu KFUM og KFUK í Reykjavík, sími 588 8899.
Myndir frá flokkum m.a. nokkrar frá veislukvöldi.
Ársæll Aðalbergsson, forstöðumaður.