Það er sannkölluð veislumáltíð í kvöld, myndataka og kvöldvaka sem er af lengri og dýrari gerðinni, með bikarafhendingu, Biblíuspurningakeppni, leikritum, Sjónvarp Lindarrjóðri og lokapartinum í framhaldssögu um hann Pál geimfara.
Við fögnum nokkrum afmælum á þessum stórmerka 2 júlí. Drengur á 4 borði hann Teódor fagnar deginum sínum, matráðurinn Valborg Rut Geirsdóttir fagnar hvorki meira né minna en 20 ára starfsafmæli og undirritaður er einnig árinu eldri í dag. Því er til mikils að fagna og ég er ekki frá því að við fáum að standa á stól og gæða okkur á afmælisköku í kaffinu í dag.
Matseðill dagsins
Morgunverður: Morgunkorn og mjólkurvörur
Hádegisverður: Úrvals afgangar frá vikunni (enga matarsóun hér takk) ásamt ávaxtasúrmjólk (NAMM)
Síðdegishressing: Kaka og brauðmeti
Kvöldverður: Veislu schnitzel og veglegt meðlæti
Kvöldhressing: Kex og mjólk
Dagskráin á heimkomudegi
Drengirnir hafa verið vaktir kl. 08:30 á morgnana en á brottfarardag (á morgun) er venja að gefa þeim ögn lengri svefn. Haninn mun því gala kl. 09:00, þá munu drengirnir fara í morgunmat, pakka í töskur, finna dótið sitt og halda svo út í frjálsan tíma og skipulagða hópleiki. Því næst verður haldið í hádegismat, í pizzu að hætti Vatnaskógar og síðan verða óskilamunir kynntir sem fundist hafa á víð og dreif um svæðið.
Rútan leggur af stað frá Vatnaskógi kl. 14:00 og áætluð koma á Holtaveg 28 er því kl. 15:00.
Þau ykkar sem hyggjast sækja drengina sína í Vatnaskóg eru beðin um að koma eigi síðar en kl. 13:30. Vinsamlegast látið vita ef þið ætlið að sækja ykkar drengi sjálf ef þeir eru skráðir í rútuna heim, svo töskurnar þeirra fari ekki upp í rúturnar. Þeir sem verða sóttir í Vatnaskóg munu koma farangri sínum fyrir framan matskálann. Endilega látið vita sem fyrst en símatíminn er eins og fyrr segir milli kl. 11:00-12:00 og síminn er 433 8959.
Allir óskilamunir sem ekki skila sér til drengjanna í Vatnaskógi munu fara á Holtaveg 28 í Reykjavík, félagsheimili KFUM og KFUK.
Þetta er síðasta færslan frá 5. flokki 2025. Við sem störfum í Vatnaskógi erum þakklát fyrir það traust sem foreldrar sína okkur með því að senda börn sín í sumarbúðir og tökum það traust alvarlega. Það er og metnaður okkar sem störfum í Vatnaskógi að gera gott starf enn betra. Ef þú hefur ábendingar, athugasemdir eða vilt hafa samband við okkur hér í Vatnaskógi í tengslum við 5. flokk getur þú sent tölvupóst á arsaell@kfum.is eða haft samband við skrifstofu KFUM og KFUK í Reykjavík, sími 588 8899.
Myndasíðan okkar er hér fyrir neðan.
Með virðingu og þökk,
Pétur Sigurðsson, f.h. forstöðumanna