Í gær komu rúmlega 100 drengir í 12. flokk Vatnaskógar þetta sumarið.

Það er búið að vera mikil dagskrá fyrir drengina. Má þar nefna hópleiki og ýmsa útileiki, smíðaverkstæðið, frjálsíþróttakeppnin, allt það sem íþróttahúsið hefur upp á að bjóða og margt fleira, að ógleymdri Svínadalsdeildinni, knattspyrnumótinu fræga. Þá nutu drengirnir að fara út á báta. Í gær var gott veður en fór að rigna með kvöldinu en í dag var rigning fram eftir morgni en síðan braust sólin fram og hið fínasta veður seinni partinn!

Á kvöldin höldum við kvöldvöku með tilheyrandi söng, leikriti og hugleiðingu, ásamt framhaldssögu sem verður spennandi að fylgjast með.

Starfsfólk

Foringjar sem annast dagskrá og umönnun drengjanna eru þeir:

Tómas Andri Gíslason – 1. borð
Nói Pétur Ásdísarson Guðnason – 2. borð
Tómas Ingi Halldórsson – 3. borð
Benedikt Þórisson – 4. borð
Guðjón Daníel Bjarnason– 5. borð
Steinn Trausti Traustason – 6. borð
Helgi Þórir Sigurðsson – 7. borð
Jakob Freyr Einarsson – 8. borð

Þeim til halds og trausts verða Baldur Ólafsson og forstöðumennirnir Þorsteinn Arnórsson og undirritaður, Ársæll Aðalbergsson.

Eldhúsi og þrifum á staðnum stýrir matráðurinn Valborg Rut Geirsdóttir. Auk hennar starfa þær Kristbjörg Katla Hinriksdóttir, Áslaug Rún Davíðsdóttir, Messíana Baldvinsdóttir og Sólný Helga Sigurðardóttir.

Þess utan eru ungir aðstoðarforingjar á svæðinu, framtíðarleiðtogar í starfi KFUM og KFUK. Þeir ganga í allskonar verkefni á svæðinu, hvort sem það er aðstoð í gönguferðum, uppvask, smíðar, frágangur og tiltekt á svæðinu eða skipulag leikja undir umsjón foringja. Aðstoðarforingjar þessa vikuna eru þau Arnór Emil, Bjartur, Bjarki Þór, Haukur og Sigurvin Elí.

Þá eru Sigurður Jóhannesson, Snorri Rúnarsson og Þórir Sigurðsson í flokknum en þeir koma að ýmsu daglegu viðhaldi á tækjum og húsnæði. Að ógleymdum okkar eina sanna Alberti Ebenezer Bergsteinssyni, sem sér um að slá grasið á rauðu þrumunni, þegar til þess viðrar. Þá eru nokkrir iðnaðarmenn á svæðinu en þessa dagana er verið að reisa nýjan Matskála í Vatnaskógi, sem er mjög spennandi að fylgjast með.

Matseðill mánudgs

Hádegisverður: Lagsagne og meðlæti
Nónhressing: Nýbakað bakkelsi af bestu gerð
Kvöldverður: Grillaðar pylsur
Kvöldhressing: Ávextir

Matseðill þriðjudags

Morgunmatur: Korn flex og Cheerios
Hádegisverður: Fiskibollur með karföflum og karrýsósu
Nónhressing: Nýbakað bakkelsi af bestu gerð
Kvöldverður: Grjónagrautur og nýbakað kúmenbrauð
Kvöldhressing: Kex

Nokkur orð um heimþrá

Í rúmlega 100 manna hópi er ekki ólíklegt að einhverjir drengir finni fyrir heimþrá fyrsta sólarhringinn eða svo. Því þykir mér mikilvægt að útskýra fyrir þeim foreldrum sem áhuga hafa hvaða hugmyndafræði og nálgun við aðhyllumst í þessum flokki í Vatnaskógi í tengslum við heimþrá. Því er hér smá innlegg.

Þrátt fyrir að heimþrá hafi ekki mikil áhrif nema á mjög lítinn hluta þeirra sem hér dvelja hverju sinni er heimþrá mikilvæg tilfinning og getur snert okkur öll. Heimþrá snýst um missi og er þannig nátengd sorg. Viðbrögð drengjanna eru þannig oft eins og skyndikúrs í sorgarviðbrögðum. Þegar heimþrá nær tökum á drengjunum, geta þeir komið með ásakanir, lokað sig af, reiðst og/eða notað samningatækni til að takast á við vanlíðan/sorgina. Stundum fylgir líkamleg vanlíðan, oftast nær í tengslum við magann (eða meltingarkerfið) en getur einnig komið fram sem hausverkur eða stirðleiki í liðum.

Fullorðnir einstaklingar þekkja væntanlega flest þessi einkenni, enda fullkomlega eðlileg viðbrögð við áfalli og breyttum aðstæðum. Fyrir marga drengina í sumarbúðum eru þessar sveiflukenndu og sterku tilfinningar hins vegar nýjar og jafnvel áður óþekktar og þeir hafa ekki hugmynd um hvernig hægt er að takast á við þær.

Í Vatnaskógi leggjum við áherslu á að takast á við þessar tilfinningar í samráði við foreldra og höfum samband strax og við teljum að tilfinningarnar hefti tækifæri drengjanna til að njóta dvalarinnar. Það að við höfum samband merkir samt alls ekki að við teljum að viðkomandi drengur þurfi að fara heim, heldur miklu fremur viljum við að þekking foreldra á barninu nýtist til að hjálpa okkur að finna leiðir til að leyfa barninu að njóta sín. Samskipti og samstarf milli allra aðila, barns, foreldra og starfsmanna er lykill að þessu.

Aðferðafræðin í heimþrármálum hérna í Vatnaskógi þessa vikuna er sú að hjálpa barninu að brjótast út úr sorgarferlinu, sættast við umhverfi sitt og sjá tækifærin í dvölinni. Þannig viðurkennum við og skiljum tilfinningarnar en reynum að beina athygli þeirra frá vanlíðaninni að tækifærunum.

Við trúum því að þessi reynsla drengjanna og það að láta ekki stjórnast af vanlíðan, þó hún sé viðurkennd, sé mikilvæg fyrir drengina og hjálpi þeim til að þroska tilfinningar sínar og andlegt atgervi. Við skiljum þó líka að það getur gerst að aðstæður, upplifun og tilfinningar drengjanna séu þess eðlis að þeir eru einfaldlega ekki tilbúnir til að takast á við dvölina og þurfa að vera skemur en áætlað var í upphafi. Það gerist þó mjög sjaldan.

Ef það eru einhverjar spurningar þá er símatími forstöðumanns á milli 11:00 og 12:00 alla daga. Símanúmerið er: 433 8959.

Myndir úr flokknum munu birtast inn á þessa síðu: MYNDIR HÉR!