Það voru hressir strákar sem komu í Vatnaskóg í gær. Þegar allir höfðu fundið sitt borð og komið sér fyrir í svefnskálanum var boðið upp á egg, beikon og bakaðar baunir í hádegismat.
Eftir mat hófst dagskráin hjá okkur með stuttri skoðunarferð um svæðið. Strákarnir fengu kynningu á íþróttahúsinu, bátaskýlinu, kapellu og öðrum skálum. Ákveðið var að hafa bátana opna og voru þeir vinsælir hjá mörgum. Á efri hæð bátaskýlisins var opnað smíðaverkstæði þar sem drengirnir geta hannað og smíðað ýmsa hluti úr við sem kemur úr skóginum hjá okkur.
Þá var Listasmiðjan opnuð, þar var hægt að búa til svokallaða „stressbolta“ sem margir dunduðu sér við. Íþróttahúsið var á sínum stað en þar er mögulegt að fara í borðtennis, körfubolta, fótboltaspil eða slaka á með góða syrpu í hönd.
Í morgun þegar við vöknuðum var vatnið spegilslétt og var fínasta veður hérna í skóginum, í hádeginu hafði hins vegar aðeins kólnað hjá okkur. Sumir hafa verið í listasmiðjunni í dag og er verkefni dagsins að smíða „larpsverð“ sem eru mjúk hættulaus sverð sem nota má í ævintýraferðum í skóginum.
Myndir úr flokknum má finna hér: https://www.flickr.com/photos/kfum-kfuk-island/sets/72157656690707799
Kveðja úr Lindarrjóðri,
Ásgeir Pétursson