Hápunktur gærdagsins reyndist vera vatnafjörið eftir kaffi, en tveir góðir Skógarmenn komu á svæðið í dag með glæsilegt vatnatrampólín. Annar fiskur flokksins veiddist í gær og stelpurnar tóku þátt í frjálsum íþróttum, meðal annars kúluvarpi.
Meðal annarra verkefna má nefna mafíu og vinabandagerð, einhverjar stúlkur léku stutta leikþætti sem voru teknir upp og smíðaverkstæðið var opið.
Nú í morgun fengu stúlkurnar að sofa 30 mínútum lengur en venjulega og taka síðan þátt í Skógarmannaguðsþjónustu að loknum morgunverði. Hvern sunnudag taka þátttakendur í starfi Vatnaskógar þátt í guðsþjónustu sem að jafnaði er haldin í hátíðarsalnum okkar í Gamla skála. Áður fyrr var algengt að þátttakendur í flokkum gengu til guðsþjónustuhalds í Hallgrímskirkju á Saurbæ hér á Hvalfjarðarströnd en verulega hefur dregið úr því á seinni árum.
Skógarmannaguðsþjónustan í hátíðarsalnum verður með mjög hefðbundnu sniði og lögð áhersla á að kynna og útskýra helstu liði klassískrar guðsþjónustu.
Myndir úr 8. flokki
https://www.flickr.com/photos/kfum-kfuk-island/sets/72157671362264505/
Það er metnaður okkar sem störfum í Vatnaskógi að gera gott starf enn betra. Ef þú hefur ábendingar, athugasemdir eða vilt hafa samband við okkur hér í Vatnaskógi getur þú sent tölvupóst á elli@vatnaskogur.net.
Með kveðju úr Skóginum,
Dagrún Linda og Halldór Elías (Elli)