Í dag komu um 100 drengir í Vatnaskóg og munu þeir dvelja hér fram á fimmtudaginn 29.júní. Þegar að drengirnir komu hingað byrjuðu þeir á því að velja sér borð í matskálanum til þess að sitja við, borð 1 til 7. Við hvert borð er borðforingi sem annast drengina og hefur gott eftirlit með þeim.
Hér er gott veður, 15°C og logn. Allt gengur mjög vel. Þetta eru hressir og skemmtilegir drengir sem eru duglegir að taka þátt í því sem er í boði eins og t.d. útileikir, keppnir í ýmsum greinum frjálsra íþrótta, skemmitlegir innleikir, bátar og að ógleymdir smíðastofunni. Rétt eins og Besta deildin er komin af stað þá er Svínadalsdeildin komin á fulla ferð hér í Vatnaskógi en í henni keppa borðin sín á milli í fótbolta, mjög spennandi. Í kvöld verður svo kvöldvaka að hætti Skógarmanna með leikjum, leikritum, framhaldssögu, hugleiðingu og söng.
Ævintýraflokkur 1 er rétt að byrja.
Maturinn
Hádegismatur: Ýsa í raspi, kartöflur og salat.
Kaffitími: Súkkulaðikaka, bananabrauð og ávextir.
Kvöldmatur: Kjötbollur, stappa og grænmeti.
Kvöldkaffi: Ávextir – epli, appelsínur og bananar
Nokkur orð um heimþrá
Í tæplega 100 manna hópi er ekki ólíklegt að einhverjir drengir finni fyrir heimþrá fyrsta sólarhringinn eða svo. Því þykir mér mikilvægt að útskýra fyrir þeim foreldrum sem áhuga hafa hvaða hugmyndafræði og nálgun við aðhyllumst í þessum flokki í Vatnaskógi í tengslum við heimþrá. Því er hér smá innlegg.
Þrátt fyrir að heimþrá hafi ekki mikil áhrif nema á mjög lítinn hluta þeirra sem hér dvelja hverju sinni er heimþrá mikilvæg tilfinning og getur snert okkur öll. Heimþrá snýst um missi og er þannig nátengd sorg. Viðbrögð drengjanna eru þannig oft eins og skyndikúrs í sorgarviðbrögðum. Þegar heimþrá nær tökum á drengjunum, geta þeir komið með ásakanir, lokað sig af, reiðst og/eða notað samningatækni til að takast á við vanlíðan/sorgina. Stundum fylgir líkamleg vanlíðan, oftast nær í tengslum við magann (eða meltingarkerfið) en getur einnig komið fram sem hausverkur eða stirðleiki í liðum.
Fullorðnir einstaklingar þekkja væntanlega flest þessi einkenni, enda fullkomlega eðlileg viðbrögð við áfalli og breyttum aðstæðum. Fyrir marga drengina í sumarbúðum eru þessar sveiflukenndu og sterku tilfinningar hins vegar nýjar og jafnvel áður óþekktar og þeir hafa ekki hugmynd um hvernig hægt er að takast á við þær.
Í Vatnaskógi leggjum við áherslu á að takast á við þessar tilfinningar í samráði við foreldra og höfum samband strax og við teljum að tilfinningarnar hefti tækifæri drengjanna til að njóta dvalarinnar. Það að við höfum samband merkir samt alls ekki að við teljum að viðkomandi drengur þurfi að fara heim, heldur miklu fremur viljum við að þekking foreldra á barninu nýtist til að hjálpa okkur að finna leiðir til að leyfa barninu að njóta sín. Samskipti og samstarf milli allra aðila, barns, foreldra og starfsmanna er lykill að þessu.
Aðferðafræðin í heimþrármálum hérna í Vatnaskógi þessa vikuna er sú að hjálpa barninu að brjótast út úr sorgarferlinu, sættast við umhverfi sitt og sjá tækifærin í dvölinni. Þannig viðurkennum við og skiljum tilfinningarnar en reynum að beina athygli þeirra frá vanlíðaninni að tækifærunum.
Við trúum því að þessi reynsla drengjanna og það að láta ekki stjórnast af vanlíðan, þó hún sé viðurkennd, sé mikilvæg fyrir drengina og hjálpi þeim til að þroska tilfinningar sínar og andlegt atgervi. Við skiljum þó líka að það getur gerst að aðstæður, upplifun og tilfinningar drengjanna séu þess eðlis að þeir eru einfaldlega ekki tilbúnir til að takast á við dvölina og þurfa að vera skemur en áætlað var í upphafi. Það gerist þó mjög sjaldan.
Starfsfólk
Foringjar sem annast dagskrá og umönnun drengjanna eru þeir:
Almar Tristan Almarsson og Tómas Ingi Halldórsson, 1. borð – Útileikjaforingjar
Ísak Jón Einarsson, 2. borð – Bátaforingi
Nói Pétur Ásdísarson Guðnason, 3. borð – Knattspyrnuforingi
Benedikt Þórisson og Markús Guðmundsson, 4. borð – Íþróttahallarforingjar
Gunnar Hrafn Sveinsson, 5. borð – Flotamálaforingi
Þráinn Andreuson, 6. borð – Yfirforingi
Hreinn Pálsson, 7. borð – Frjálsíþróttaforingi
Borðlausir foringjar eru:
Gunnar M. Sandholt – Öldungur, sögumaður og vélstjóri
Guðni Már Harðason – Prestur í Lindakirkju
Eiríkur Skúli Gústavsson – Lögreglumaður
Fannar Logi Hannesson – Ævintýraforingi
Gunnar Hrafn Sveinsson og Hreinn Pálsson eru einnig forstöðumenn flokksins.
Eldhúsi og þrifum á staðnum stýrir ráðsmaðurinn Sverrir Hákon Marteinsson. Í eldhúsinu starfa einnig Helga Vigdís Thordersen, Katrín Hekla Magnúsdóttir, Guðjón Daníel Bjarnason, Eva Lind Hákonardóttir og Birna Júlía Björnsdóttir.
Þess utan eru ungir aðstoðarforingjar á svæðinu, framtíðarleiðtogar í starfi KFUM og KFUK. Þeir ganga í allskonar verkefni á svæðinu, hvort sem það er aðstoð í gönguferðum, uppvask, smíðar, frágangur og tiltekt á svæðinu eða skipulag leikja undir umsjón foringja. Aðstoðarforingjar þessa vikuna eru þau Bjartur, Jón, Hallur, Halldóra og Bríet.
Þá eru Albert Ebenezer Bergsteinsson, Þórir Sigurðsson og Sigurður Jóhannesson í flokknum en þeir koma að ýmsu daglegu viðhaldi á tækjum og húsnæði. Að lokum eru tveir starfandi vinnumenn í flokknum, þeir Pétur Bjarni Sigurðarson og Snorri Rúnarsson, þeir koma til með að sinna hinu og þessu í Vatnaskógi, slá grasið, byggja palla og þar fram eftir götunum.
Ef það eru einhverjar spurningar þá er símatími forstöðumanns á milli 11:00 og 12:00 alla daga. Símanúmerið er: 433 8959
Nýjar myndir koma inn flickr síðu Vatnaskógar hér að neðan.
Hreinn Pálsson, forstöðumaður
