Frábær byrjun í skóginum!
Gauraflokkur í Vatnaskógi hófst með stæl í gær þegar hópur glaðra og orkumikilla stráka mætti á svæðið tilbúnir í ævintýri. Strax eftir komuna var farið að kynnast – bæði í gegnum leiki og samtöl – og lögð áhersla á að byggja upp góða stemningu, traust og vináttu.
Eftir að allir höfðu komið sér fyrir og hitt sína leiðtoga beið þeirra fjörug dagskrá. Strákarnir fengu að prófa bátana á vatninu þar sem margir sýndu mikið hugrekki og gleði. Sumir busluðu í vatninu þrátt fyrir að hitatölurnar úti hafi ekki verið háar.
Seinni hluti dagsins fór fram meðal annars í íþróttahúsinu þar sem fjölbreyttir leikir voru í boði – bæði boltaleikir og borðtennis.
Það hefur þegar myndast góð tenging milli margra og flestir virðast tilbúnir að taka þátt með opnum huga. Fyrsti dagurinn hefur því sannarlega sett tóninn fyrir dagana framundan – gleði, virkni og góð tengsl.
Við hlökkum til næstu daga í skóginum!
Með kveðju,
Starfsfólk Gauraflokks – Vatnaskógur 2025