Kæri lesandi.
Eitt og annað hefur átt sér stað hjá okkur í ævintýraflokki síðustu sólarhringa.
Eftir kvöldkaffi í gær varð uppi fótur og fit í matsalnum þar sem foringjar drengjanna fóru að metast um hvaða borð væri best og gæti sigrað öll hin í hvaða keppni sem er. Foringjar flugu í loftinu og myndarammi brotnaði, segja má að menn hafi látið kappið bera fegurðina ofurliði. Deilurnar færðust yfir í íþróttahúsið þar sem borðin kepptu sín á milli í Dodgeball til að skera úr um ágreininginn og fór svo að lokum að borð 4 stóð uppi sem sigurvegari, með foringjann og eyjamanninn Snorra Rúnarsson sem fyrirliða.
Drengirnir voru vaktir kl. 09:00 í morgun. Í morgunmat var boðið upp á eðalmorgunkorn og hafragraut ásamt mjólkurvörum, rúsínum og púðursykri. Síðan var haldið í fánahyllingu, morgunstund, biblíulestur og loks hófst frjáls tími. Svínadalsdeildin heldur áfram í dag, fjölbreyttar keppnir bæði í frjálsum og í íþróttahúsinu sjálfu, ásamt hjólabílum og smíðaverkstæði. Bátarnir eru vinsælir og hér á staðnum eru þolinmæðir og stórhuga veiðimenn sem láta ekki úrhellisrigningu stöðva sig frá því að sitja á bát tímunum saman.
Við höldum áfram með ævintýraflokkinn og erum með margt spennandi á teikniborðinu hvað dagskrá varðar, hlökkum til.
Matseðill
Morgunmatur: Morgunkorn, súrmjólk og hafragrautur
Hádegismatur: Gufusoðinn þorskur með epla og lauk-karrý ragú, ásamt kartöflum.
Kaffitími: Súkkulaðibitakökur og pizzasnúðar
Kvöldmatur: Pastaréttur með bacon og pylsum
Kvöldkaffi: Ávextir og kex
Með kærri kveðju úr Skóginum,
Hreinn Pálsson, forstöðumaður
Myndir bætast hér inn á Flickr reglulega
